വീട് ബെസ്റ്റാകണമെങ്കിൽ മസ്റ്റാണ് സൺഷെയ്ഡ്

 കണ്ടാൽ ആരും നോക്കി നിന്നുപോകണം. ഒരു വീട് പണിയുമ്പോൾ ഇത്തരം സങ്കൽപ്പങ്ങൾ  മനസ്സിൽ വെച്ച് വീടിന്റെ പ്ലാൻ ഡിസൈനിങ് ചെയ്യിപ്പിക്കുന്നവരുടെ എണ്ണം ഇന്ന് നമ്മുടെ നാട്ടിൽ നാൾക്കുനാൾ വർദ്ധിച്ചു വരികയാണ്. എന്നാൽ ഈ വിദേശ ഡിസൈനുകൾ  നാട്ടിലേക്ക് കൊണ്ടുവരാൻ ആഗ്രഹിക്കുന്നവർക്ക് അവിടുത്തെ കാലാവസ്ഥ ഇങ്ങോട്ട് കൊണ്ടുവരാൻ സാധിക്കില്ലല്ലോ എന്ന തിരിച്ചറിവുണ്ടാവുന്നത് ഏറെ വൈകിയാവും. അപ്പോഴേക്കും കാലാവസ്ഥയുടെ എല്ലാവിധ മാറ്റങ്ങളും അതേപടി വീടിന്റെ അകത്തിരുന്ന് അനുഭവിക്കാൻ തുടങ്ങിയിട്ടുണ്ടാകും  വീട്ടുകാർ. 

 വീട് നിർമാണത്തിൽ വിദേശ ഡിസൈനുകൾ മാതൃകയാക്കുന്നതോടെ സൺ ഷെയ്ഡ് എന്നത് ഒരു അഭംഗിയായോ അധികപ്പറ്റായോ കാണുന്നവരാണ് ഭൂരിഭാഗം പേരും. അതിന്റെ വരും വരായികകളെക്കുറിച്ച് വിവരമുള്ളവർ പറഞ്ഞു കൊടുത്താലും  കാര്യമാക്കാറില്ല. എന്നാൽ നമ്മുടെ നാട്ടിലെ വീടുകളെ സംബന്ധിച്ചിടത്തോളം സൺ ഷെയ്ഡ് എന്നത് വീടിന് ചുറ്റും ഉന്തി നിൽക്കുന്ന ഭിത്തി മാത്രമല്ല മാറിമാറി വരുന്ന കാലാവസ്ഥയിൽ നിന്ന് വീടിനെ കാക്കുന്ന ഒരു ലക്ഷ്മണരേഖ കൂടിയാണെന്ന് മനസ്സിലാക്കേണ്ടത് അത്യാവശ്യമാണ്.

 ഇത്രയേറെ ഉപകാരി ആയിട്ടും വീടിന്റെ ഭംഗി കെടുത്തുന്നവൻ എന്ന വിളിയാ ബാക്കി.... പാവം സൺഷെയ്ഡുകൾ!